Չեմպիոնների լիգայի փլեյ-օֆֆում թույլ թիմեր չեն լինում, ասել է Դորտմունդի «Բորուսիայի» ու Հայաստանի հավաքականի կիսապաշտպան Հենրիխ Մխիթարյանը: 24-ամյա ֆուտբոլիստը խոսել է Սանկտ Պետերբուրգի «Զենիթի» դեմ Չեմպիոնների լիգայի 1/8 եզրափակիչի դիմակայության մասին:

«Այս փուլում հեշտ մրցակիցներ չեն լինում: Բոլոր թիմերն էլ ունեն իրենց արժանիքները: Ով գիտի, թե մինչեւ այդ խաղերն ինչ տեղի կունենա մեր մրցակցի հետ: Խոսքը նաեւ նոր ֆուտբոլիստներ ձեռք բերելու մասին է:

Ինչ վերաբերում է խաղային պրակտիկայի բացակայությանը, «Զենիթը» կանցկացնի շատ ընկերական խաղեր եւ «Բորուսիայի» հետ դիմակայությանը կնախապատրաստվի ինչպես հարկն է: Չմոռանանք նաեւ, որ Սանկտ Պետերբուրգի եղանակը եւ խոտածածը օպտիմալ չեն լինի մեզ համար»,- Մխիթարյանի խոսքը մեջբերում է «Чемпионат»-ը:

Հիշեցնենք, որ «Զենիթի» եւ «Բորուսիայի» միջեւ առաջին խաղը կկայանա փետրվարի 25-ին Սանկտ Պետերբուրգում: